第一孕程 (0-12W) 順利通過！

***呢篇野...因為我太攰/hea/懶/不適...前前後後打左成個月🙈去到呢一刻已經15W4D了***

終於嚟到期待已久既12w（請幫我歡呼3聲先！），代表我順利通過孕程第一階段，亦代表胎兒開始穩定（過咗3個月唔使再講大話/支吾以對），終於可以好好紀錄一下呢3個月以嚟生理同心理變化。


呢3個月既體驗完全超出咗我既想像，無諗過只係少少既hormone變化可以將我既身體變得好陌生（朋友形容「懷孕就像在海上漂流」，簡直全中無補充），直頭進入左瘋狂模式。雖然控制唔到自己同埋都幾難受，但亦覺得人體好奇妙，經歷過後總會覺得好得意好有趣 :) 因為體質人人唔同，係第一孕程既感受都不盡相同，有d媽媽完全無感覺，有d媽媽得返半條人命（好佩服堅持返工既媽媽，超人既意志）。雖然我未去到最嚴重級別，但極慶幸自己係critical moment決定辭職，除咗可以有充足既休息，亦可以避免係武肺第二及第三波期間外出。開始時總懷疑自己辭職既決定，但幸好唔知從何而來既gut feeling/直覺幫我決定了，timing 亦掌握得非常好，非常感恩。

以下係我第一孕期出現既生理同心理變化，每日至少出現2項或以上，好有趣，值得紀錄一下。
1. 頭痛：由未發現自己有咗開始，頭痛已經侵襲。我懞盛盛以為自己因爲帶口罩太焗，係炎夏高溫之下遊走中環先會頭痛。到咗今日我仍然會時不時頭痛到思考唔到，好想撞牆。
2. 頭暈：伴隨住頭痛嚟既仲有頭暈，基本上一轉姿勢就要冷靜一下先可以再移動。人生未試過暈到咁樣，結果需要食止暈藥先好少少。第一個月暈到好似坐足全日過山車，腦眼昏花，去到今日仍然會好似搭舢板過大海咁，浪下浪下。連睇電視/玩電話/搭地鐵時只要眼前畫面移動得好快都會暈。
3. 五感敏感度高度提升：不論味覺、視覺、聽覺、嗅覺、觸覺都變得極度敏感。
-味覺：會突然想食某種食物，一諗到就要食，否則嗰種食物味就會吞沒我整個人，一定要食到為止（呢個時候最辛苦隊長，辛勞一天仲要應酬我不知從何而來既無理要求）。食唔到垃圾食物e.g.杯麵/麥當勞等，又食唔到米飯，一食就好易嘔，但神奇地食到米粉、粉絲。
-視覺：唔可以睇到移動得好快/好多/好密集既東西，否則會即嘔😂有時唯有合埋眼匿埋一邊，避免去到人多既地方（見到人多得濟又會嘔😂），連睇書/片都會集中唔到。
-聽覺：好怕聲好怕嘈，睇片/煲劇都淨係可以細細聲，一有人多講野就要停一停，聽唔到有人聲唱既歌（陳奕迅演唱會每首歌都大概要pause3次先聽得完）
-嗅覺：進化到同健太一樣嗅覺靈敏，一聞到鄰居煮飯就會想嘔，唔可以聞到油煙味/魚腥味，總之一有味就好易嘔（所以成3個月無親自煮過飯）。另外覺得自己變得好臭好臭（係成個人都好臭），聞到自己陣味又會嘔（但隊長完全聞唔到我有味）
-觸覺：由第一個月開始，只要iPhone/ iPad 一接觸到肚腩/大髀就會產有強烈厭惡感，有種好強烈拒絕既感受，玩電話好似玩到老花人士咁，隻手要長期渣住電話又好攰
4.行動同思路變得好慢好慢：因為一快就會暈/呼吸困難，連有心急既心都會暈。平時只需5分鐘就行完既路程，宜家要用2-3倍時間，需要好專心咁行路。傾計時如果對方講野太快，個腦會hang機，聽得30%，會漏聽左好多資訊，成個人好似玩Mario Kart中咗龜殻咁要減速，令講野/聽野好快、心急又last minute 先出門口既我好唔習慣，個人成舊雲咁，無心裝載、無心機又無記性咁，online shopping 1小時已經好攰好吃力
5.嘔&胃酸澎湃火燒心：控制唔到自己咁嘔，嘔係噴射式咁嘔，會嘔到鼻塞/喊（控制唔到的）。可能係因為氣味/食物味道，又或者唔知點解突然會嘔，好無厘頭想嘔就嘔，飲水食維他命都嘔，好瘋狂。胃酸長期去到心口位置浪浪下，波濤洶湧咁，胸口食道都會有灼熱感，無論清醒定瞓覺都會feel到胃酸既存在（哭）

6.皮膚容易生暗瘡同埋背脊生左好多粉刺，好唔舒服，好似仙人掌咁好多一粒粒😭都唔開心咗一陣間，最後用磨砂沖涼先改善到，好唔習慣

7. 皮膚最近開始好痕好痕，會半夜痕醒，痕到個心口同個肚就會穿咁，我要開始搽油了🙈
 8. 瘋狂去weewee同完全去唔到poopoo: 因為咁我先知道可以正常去廁所係幾咁幸福既一年事😭呢兩個極端體驗簡直令我懷疑人生。大家知道我就嚟癲，不斷提供各種偏方e.g. Yoghurt，麒麟果，奇異果，西梅，西梅汁，起身飲2公斤暖水，各式各樣既生果同菜，按摩etc...有一日我太崩潰試過同一日食晒做晒以上所有野，但都完全無反應，d野食好似入咗黑洞咁😨🥶...最後救我出深淵既係益生菌LOL好多謝教我食益生菌既朋友同埋d益生菌，我每次食都抱住好感恩既心多謝每粒菌（都好多十個Billion嫁）😂❤️

有個痴線婆驚我poo唔到d屎會上腦好擔心我，山長水遠買左一大樽梅汁俾我，
仲驚我悶買埋花上嚟俾我插，因為我瞓咗唔敢嗌醒我，拎到上嚟門口擺低就閃咗，好瘋狂

9.新陳代謝變得好快：頭髮同指甲都長得好快，死皮都生得好快，體溫變得好高（多次懷疑自己發燒），就算24小時開住冷氣都會流汗，由其瞓覺時會好熱好熱

10. 每日只有瞓覺同食嘢：因為好攰加上食止暈止嘔藥，成個人眼瞓到震，一日大概瞓15-18個鐘，除左去廁所同食嘢。基本上真係攤係到軟爛LOL

11.個肚好重好重，唔知點解只係第一孕期都咁重。習慣趴住瞓既我已經唔可以再壓住個肚瞓，側身瞓落床都要慢慢落，我有一日唔記得咗要慢，一嘢就彈起身，結果扯親個肚🙈🤷🏻‍♀️

12. 情緒會有少少激動，好小事就會黑面/勞氣/動氣🙈呢到要讚下K，除左無放地雷激親我炸傷自己，仲會係我激動時冷靜地平伏我既心情💕因爲咁我都唔算激動得好多次，同埋好多時係激動前已經知道自己會激動冷靜咗自己先

經過漫長既第一孕期，最近終於有少少起色，終於唔需要再食止暈止嘔藥，亦無咁攰，面色好返好多（因為我終於食到野，無再嘔得咁痴線）。可以做家務，產檢可以慢慢行搭地鐵，可以由地鐵站行去醫院，上星期仲開始返放狗（都係跟住散步，未可以快行。感謝健太係屋企每日體貼地陪住我，除咗散步，佢已經好耐無去街狂玩了），有落街望下人睇下風景已經好開心，原來呢D咁平凡既日常係咁唔容易嫁。

每日陪住我嘅小乖乖

多謝K好體貼亦好願意學習照顧同陪伴我（倒返轉佢大肚我都未必有咁好耐性咁體貼照顧佢啊真係，我自己都頂自己唔順，好忟憎），K直頭多次估到我心入面想食咩味既野，好神奇！希望之後既我唔好再係咁麻煩啦，平時習慣自己一支箭衝衝衝，宜家要人照顧好唔習慣啊！

估中晒我每日心情想食咩，未開聲已經買咗返嚟，點做到架

下星期將會係第3次私家產檢了，會知道bb係男孩子定女孩子呵呵（身邊得4個人估係女孩子咋！其他都話係男孩子），期待！