產檢12345

好感恩有奶奶，由我發現有咗一刻開始，佢就問我有冇相熟既婦產科醫生（os：無啊奶奶），無既話就帶我去睇佢相熟既醫生朋友（係啊！就係當年接生K嗰個啊！）。我其實唔知頭唔知路，奶奶除咗細心講解仲幫我約埋時間😭之後仲擔心我唔識野山長水遠陪我去產檢❤️好定檔，我知道自己即使發夢都唔緊要lol有唔識就搵奶奶啦😂

因為疫情關係同埋身體不適，除咗產檢我其他時間都無出過街🙈好瘋狂啊！每次出門由屋企行到地鐵站已經有去機場嘅感覺，旅行感好重，好興奮啊😆


第1次產檢（6W）
奶奶幫我約左10am，對於平時瞓到下晝4pm既我真係好大挑戰😂不過奶奶既然約咗，朝早又少人d，早就早啦🙈第一次產檢主要係由醫生確認我真係懷孕（唔係搞事），原來要去到6W先會見到BB心跳（俗稱閃閃）。我哋約咗係診所直接等，K作為新手爸爸即刻睇晒診所有咩懷孕相關資訊😂奶奶送咗好多摺好晒做三角形既膠袋仔for出街嘔同收集wee sample既樽仔俾我，貼心度3000！

醫生雖然係比較資深（當年接K出世喎！），樣子隔住口罩又比較嚴肅有威嚴，講嘢得重點無廢話，但內裏搞笑，有種喜感🙈
（檢查前）
醫：你哋結咗婚幾耐啊？
我：（errrr...嘗試回想中）
K：3年啦！
醫：下！3年先有？搞乜搞咁耐啊你哋
我：🤣🤣🤣（望住K）係囉！搞咩呀你搞咁耐（轉身射個3分波）
K：😅
醫：好啦！同你檢查咗先啦！

檢查期間照肚照唔到，要照陰道超聲波。
（檢查後）
醫：（解釋返）拿！頭先因為太遠啦，照肚照唔到，所以幫你照咗個陰道超聲波
我：係咪因為我太肥d肥膏阻住咗啊？
醫：（尷尬唔識兜）err唔係唔係...有少少遠姐...少少遠姐...
我：🤣🤣👉🏻👉🏻😏😏😏

呢粒波就係我嘅bb❤️第一次見面佢得7.7mm咋！

第1次見到bb，係一粒閃閃吓既波，我同K都不其然「啊～～～～」咗一聲，聽到佢心跳聲❤️其實好surreal，呢粒波就係我個bb？其實除咗唔舒服其實feel唔到佢存在，諗到呢粒波嚟緊會慢慢變成我既bb就覺得好奇妙☺️

檢查完其實差不多lunch，我哋朝早無食早餐，諗住同奶奶飲茶，奶奶話唔使。我哋再三追問先知原來佢太緊張太興奮，晨早起身驚自己緊張得滯搭車會暈，係屋企食咗好大個早餐先出門口🤣🤣奶奶係好斯文好含蓄嘅人，興奮到咁真係笑死我同K🤣🤣🤣

第2次產檢（9W）
上次拎咗醫生封確認懷孕既信，我就可以排埋公立嗰邊兩邊檢查。
原來9W大既BB開始會長出手腳，今次終於可以直接照肚啦！
我同K一見到大家都同時講「哇！好似健太瞓係走廊個樣啊！」（講完即刻俾我媽鬧）🤣🤣🤣

Hello 9W BB！

講到呢到好想同大家介紹一樣野，話說我好驚污糟好驚係街去廁所，之前買落一個係for女仔企係到去廁所既野，呢個神器係每次要驗wee時完全發揮功效，精準收集👍🏻好感謝自己買咗佢❤️

好在有佢！乾手淨腳👍🏻😏推薦俾好驚係街去廁所嘅女孩子

話說今次驗wee好無厘頭驗到我高血糖，但我明明連飯都無食，突然驗到好勁血糖。雖然驗多一次都仲係有，醫生叫我唔使咁擔心，keep住觀察自己就可以。


第3次產檢（12W）
第3次產檢係去公立醫院，由於好唔舒服，最後要搭的士。今次去主要都係由護士幫手度高磅重填表抽血開戶口d基本野，望住成個lobby都係同期大肚既媽媽，好多都自己一個嚟無老公陪就覺得自己有少少廢物，又好多謝K特登請假陪我，有佢陪心情真係輕鬆不少。最搞笑係，我哋發現公立醫院宣傳片入面嗰個男主角完全同K撞衫，令K好有投入感🤣🤣

笑到癲咗，連髮型都一樣🤣

段片主要係預告同教育新手爸媽有d咩可以做/要做咁，雖然好ETV但好清楚，最重要段片係不停翻播，唔專心嘅人都唔會有睇漏既機會😂😂其中一段劇情係介詔產房

片中護士：（介紹）每間產房可以容納兩位太太
K：（係lobby與ETV對話）但我得一位太太咋喎🧐（太投入角色，本能反應好驚係伏）
我：🤣🤣🤣🤣🤣


第4次產檢（12W）
唔知係咪要分流關係，隔咗3日我又要返去公立醫院照超聲波（俗稱度頸皮）。但因為公立醫院講明唔可以影相，今次就capture唔到bb既相。呢個時候既bb已經長出長長既手仔同腳仔❤️呢個小朋友都算好配合，好快就完成度頸皮過程，仲要伸長晒手仔腳仔狂fing跳海草舞🤣🤣🤣我同K恥笑佢佢就搵個背脊得住我哋🙈bb側面好似K，勁大個鼻，爸子K知道bb似佢佢即刻好沾沾🙈

第5次產檢（15W）

yeah！我終於可以搭到地鐵唔使搭的士👍🏻開心

今次主要係去公立醫院見醫生，講解返個result。等候期間，遇到有醫科生要做project，召集一d有食materna既媽媽做sample。就係咁，班醫科生就sponsor咗我直到36周份量既materna🙈（師奶魂覺得慳咗錢）見醫生時，護士有問我願唔願意俾醫科生學習，透過Zoom問診，期間會有真醫生睇住，我覺得「好啊！」就應承咗，社會要培育一個醫生唔容易，政府醫院既安排我個人認為好充足、專業同埋周到（so far，除咗有部分非專業職員e.g. reception/登記護士 做到滑晒牙講嘢好快好無耐性之外），有機會可以contribute返落去實在好好，希望可以有更多人受惠。

我一路以為醫科生一定係比較聰明同有邏輯，但原來大家只係普通人😂都係白紙一張，好多嘢要重新學習重新program入腦，連問問題既次序同邏輯都要學。作為patient親歷其中，會比較容易表達自己狀況，但醫科生未必可以理解到。希望呢個醫科生繼續加油！（佢問完我之後因為做得唔夠好有被醫生抦兩句，希望佢唔好放棄）

醫生最後都有補充返問多我幾句，我12W開始唔知點解多咗頭痛，仲要係好痛嗰隻。醫生懷疑我因為Hormone影響到甲狀腺，呢個時侯K就係隔離篤爆我「（全程安靜但突然大叫）佢曾經因為一次過食咗好多紫菜導致甲狀腺亢奮瞓唔到覺啊醫生！」醫生年紀應該同我哋差唔多大，傾計過程輕鬆，佢知道我做咗件咁白痴既事不停恥笑我，仲問「痴線！你究竟食咗幾多啊？食到亢奮？邊隻牌子既紫菜啊？四洲啊？」🤦🏻‍♀️🤦🏻‍♀️ 就係咁，我又要抽多次血驗甲狀腺🤦🏻‍♀️

睇完報告見仲好精神，突然好想食士多啤梨蛋糕同行muji，即刻去cwb。沿路我媽突然打嚟話買咗餸俾我要即刻拎出嚟cwb交收🤦🏻‍♀️結果K就拖住成車餸陪我行muji（除咗重仲伴隨住濃濃鮮魚腥味！）謝謝K陪我慢慢行同食蛋糕，可以食到想食既蛋糕真係好☺️

🥰拖住買餸車行cwb真係少d勇氣都唔得

係Muji行咗一個鐘（total活動時間由出門起計已經5小時），我無諗過自己會攰到行唔郁，爭d係cwb返唔到屋企。我對腳行行吓愈來愈提唔起，由盤骨至腳板都好痛好攰，成對腳硬咗個腦指揮唔到對腳，愈行愈慢愈行愈細步，我不斷叫自己唔好驚（好驚跪低），幸好K回頭發現我唔對路，企咗一陣休息咗先可以慢慢行得返🙈嚇死我啦！結果對腳抖咗兩日都仍然係好攰好攰🤷🏻‍♀️但行到想行既街係開心嘅🥳