大家的反應

發現咗自己有咗之後，第一時間梗係不停上網睇攻略！睇完又睇，睇完又即刻同隊長分享，雖然我都開始睇到有d燒腦狀態（有d媽媽真係研究得好深入鉅細無遺咁打低每一個step，有晒timeline同購物清單），可能因為太擔心既關係，當時我開始有fear of missing out既心態。
但當我每次同K講親佢好似愈來愈唔想聽咁，有一次仲叫我唔好再講，覺得已經太多資訊，process唔到。我有少少唔開心，覺得好似得我一個係到handle咁，但又知道佢唔係鬧我，而真係太多資訊，其實我都開始記唔到又睇唔晒。

嗯，btw原來有咗真係會有好多奇怪既事會發生（不論生理定心理）

包括突如其來嘅情緒（好無厘頭嫁！）

又包括好多控制唔到既生理同習慣轉變（好正常但又好奇妙，之後再講）

Anyway，第一堆non家人group 發現我有咗既係其中一堆朋友。之前約好咗朋友仔去其中一個朋友屋企Housewarming，仲話要打邊爐喪飲，我已經準備要飲到天光，點知呢個時候竟然發現有咗bb！哎呀即係唔飲得酒啦！（但其實係我未發現自己有咗之後都飲過幾次，條數點計先），我即刻同朋友仔講話我胃痛飲唔到酒，本身打邊爐想嗌菠蘿雞湯底都因為「孕婦唔食得菠蘿」而改咗做另一個湯底。醒目既朋友仔開始估我究竟因為咩事而唔飲得酒又唔食得菠蘿😆（好煩）我真心覺得係懷孕頭3個月最困難係點樣唔好俾人發現你有咗！

Housewarming當晚班朋友一見到我著鬆身裙加腫到不堪（起碼腫左2個size）就已經即刻係屋入面跑嚟跑去9叫「張meimei你係咪真係有咗啊？真係嫁真係嫁？下！好野啊！哇！你做媽媽喇！係咪未講得住啊？咁我哋唔問啦！但真係好開心啊！」我同K其實心入面好想大叫「我哋唔講得嫁！！我唔可以答係嫁！」見到班痴線frd因為我有咗bb咁高興真係好開心，即係bb出世就會有一班痴線auntie uncle陪bb發癲！

家嫂有身紀

因為當晚我無正面答既關係，隔咗幾日我又同其中一個frd食lunch，佢知道我已經開始「胃部不適」咗一輪，又腫又盛，一路食住麵一路又係餐廳笑到癲咗9叫「我好驚整親你啊！有無d咩我唔做得嫁？嘿嘿好好啊好開心啊！你做媽媽啦！係咪未講得啊！我知未夠3個月唔講得嫁！但你可唔可以話俾我知啊？」🤣🤣點樣唔講得但又可以話到俾你知啊🤣🤣

又反胃又腫到咁，連最醒目嘅朋友都發覺！

我只可以報以一個曖昧既微笑，話「胃痛姐！但原因唔講得住」

咁呢個好醒目嘅朋友就話喇：「哎呀咁我知啦我知喇！嘿嘿好野啊！啊哈哈哈哈咁你唔使講啦！我已經知道喇！」之後成餐飯一路係到嘿嘿嘿咁樣🤣我已經唔再掩飾，直接展開懷孕對話🤣

講返Housewarming嗰晚，K飲咗酒所以瞓得好好，第二朝我問佢瞓得爽唔爽，佢話「好爽！」我問點解，佢先講佢係知道我有咗之後失眠失咗好耐，用咗d時間接受自己真係要做人爸子了，直至飲咗酒先瞓得到覺（笑我完全無發覺佢失眠，因為佢從來唔會失眠），唔怪之得嗰幾日唔出聲又面青青吽吽哣哣咁啦，原來太擔心自己做老豆又唔知自己要點照顧我（笑）心理質素同抗壓力極高既K好少出現擔心既情況，見到佢咁覺得好好笑

話說奶奶係資深產房護士，除咗知識豐富又正確之外，極度尊重我既感受，好多謝佢所有嘢都考慮我，以我為先。話說我係同一時間咁岩辭咗職，係通知期期間咁啱就展開咗身體不適期。我不斷諗自己係咪辭早咗呢（後來發現呢個決定做得非常正確，只能夠講bb真係好醒好識安排好識揀timing），同奶奶講其實我應該做多一陣，奶奶即刻話「最緊要身體健康保持心情靚，工幾時都有得返啦！屋企嘅嘢交俾K啦！陀bb好攰好辛苦嫁，要好好照顧自己身體，唔使勉強啊！」奶奶真係好貼心，呢個好感動既回覆令我好釋懷。奶奶仲幫我安排咗當年接生K既醫生幫我產檢，除咗好放心之外，呢個moment我等咗好耐，因為成件事仲好有意思：即係K既出生同K既bb出生都係由同一個醫生接生，好彩趕得切醫生未退休咋，多謝佢等埋我啊！（笑）

辭職單嘢又走去問我媽，我媽通常比較兇狠現實，佢竟然直接講「搞錯！你辭得太遲啦！宜家有咗你睬佢都傻啦！對住呢d人會影響bb心智發展嫁！你對得佢耐心理都會有事嫁」另外我媽同奶奶角色好唔同，大致可以分為pre-delivery care同post-delivery care（笑）有佢哋照顧我實在好放心（痴線媽已經準備緊入補品，叫我返娘家住安胎，佢真係好high）我又可以繼續攤係到做懶肉。

因為屋企人好supportive，我無再睇攻略，心情由少少擔心到完全唔擔心，因為知道無嘢要擔心，心情又變得好輕鬆。

之前講過好想拉我入坑生仔既朋友，除咗送美少女生仔祝福戰衣俾我（笑嚟到我手已經第16代），仲即刻走去問咗佢個3歲大嘅仔「你覺得阿姨肚子裡的是男生還是女生？」阿仔即刻話「我希望是女生喇！可惜跟我一樣是男生」問咗幾次都係同一樣答案（笑）我個朋友好想我陀女啊！

另外一個朋友，我同佢講時佢咁啱渣緊車，佢話「我睇到你個msg，頭先爭d係隧道撞車」（笑）之後仲送咗本好有愛嘅書俾我，多謝佢呢份咁sweet咁有心思既禮物。

知道咗有bb之後，其實我無話好開心，就係「哦」咁。但見到身邊嘅朋友同屋企人因為呢件事好開心好開心，我都因為咁變得好開心，原來有bb真係一件好開心好被祝福嘅事，我諗bb知道未出世已經有咁多人錫佢，佢都一定好開心！好多謝大家咁錫我哋啊！