洗牙去（16W）

孕期開始無幾耐，因為不斷咁嘔，個口好唔聚財，feel到牙齒同牙肉好不適，牙肉腫得好勁，牙齒開始搖搖下，問Dr. Google下先知道原來hormone連口腔健康都會影響埋
，嚴重既有d媽媽口腔會發晒炎爆晒血，好驚！快快手book個牙醫洗牙同埋檢查下先！點知去到診所先知道原來胎兒未穩定（未滿3個月，最好4個月後），牙醫係唔會為孕婦洗牙的，所以簡單做完檢查就約期補洗牙啦。

忍咗好耐，期間雖然都keep住用漱口水同牙線，但個口真係好唔舒服啊，覺得自己點刷都唔乾淨咁😢 終於嚟到期待已久既洗牙日子，今日係我有咗bb之後第1次單獨出街。好廢物，因為條街太焗，一直都好驚自己一個會係條街暈低，無隊長陪其實唔係好敢，但我覺得係時候自己試吓（呢個時候又好懷念行動迅速超音鼠既自己）。

雖然都未算行得好快，仍然一心急就會呼吸困難，必須要專心行路外，我覺得比之前兩個月的情況實在好多了。慢慢行其實會行到的！（題外話：我已經無辦法光速食嘢，要坐好慢慢諗慢慢食，食嘢時講唔到嘢，講嘢時食唔到嘢，所有快既行為已經與我無關）

講返洗牙先，平時洗牙好驚遇到靚仔牙醫，會好害羞🙈❤️幸好今次係兇狠牙醫姨姨，咩都無講一埋嚟擘大口就洗。平時完全唔驚洗牙既我，可能因為牙肉腫既關係，洗牙嗰20分鐘痛到癲咗，係我第一次覺得洗牙咁難受，feel到牙醫姨姨完全無hea波好盡力咁幫我洗到完全乾淨為止，全程覺得棚牙同牙肉俾人用刀分離咁，口腔入面爆晒缸，連合埋口都奄奄痛。雖然好痛，但好感謝牙醫姨姨咁盡力幫我，可能佢感覺到我有d擔心，幫我洗得乾淨d :)

K一路諗要唔要買超聲波牙刷俾我，但我覺得最簡單牙刷已經非常足夠唔好搞咁多嘢（好易養的老婆）問埋牙醫意見，牙醫姨姨話我刷牙刷得非常好（從佢既表情睇嚟應該有6000分咁乾淨😁），可以刷到既地方都非常乾淨，只係有d位置都係要定期洗牙先可以洗到，日常護理繼續用牙線同漱口水補足就可以了。牙醫提醒我，話盡量唔好俾牙肉腫，因為當日後hormone 回落到正常水平時，牙肉有機會萎縮到影響埋牙齒健康。好驚，9秒9去衝買牙線同漱口水先。

熱愛收包裹的小子

洗完牙見心情好好，唔太鐘意係街到慢無目的齋行既我，行咗15分鐘街先返屋企，好耐無自己一個出街，出足2個鐘，心情非常好👍返到屋企仲收到之前訂落既媽媽用品包裹，開心🥳嘻嘻